Lia Guanc dala Gherdëina Urtijëi

Stimei nteressei,
la Lia Guanc dala Gherdëina Urtijëi Ve dà l benunì y Ve rengrazia de Vosc nteres!

La Lia Guanc dala Gherdëina Urtijëi à si sënta tl “local dla lies“ tl 2° partimënt tla Cësa de Cultura „Luis Trenker“.
L’ativiteies plu mpurtantes dla Lia ie:
a) tenì su cun lezitënza, mantenì y mpresté ora i biei Guanc dala Gherdëina che ie unic scinchei ala Lia da benfatëures o che ie unic cumprei dala Lia cun cuntribuc publics;
b) fé al savëi cie che n sà dl guant dala gherdëina a jënt nteresseda y dantaldut ala generazions che vën do;
c) mantenì la vedla tradizions;
d) fé pea pra manifestazions religëuses y mondanes d’uni sort te Gherdëina y oradeca.


I Guanc dala Gherdëina vën mprestei ora tla sënta dla Lia uni mierculdì da mei nchin de setembër dala 20 nchin la 21.30 o da n’ëura da fé ora (tel. 0471/796201); i guanc vën dantaldut mprestei ai cumëmbri dla Lia per duta la sajon da d’instà.

Pec reres y de gran valor de guant dala gherdëina ie metui ora tl Museum de Gherdëina - Cësa di Ladins a Urtijëi.

La Lia Guanc dala Gherdëina Urtijëi fesc daniëura pea pra chësta manifestazions:
• Pruzescion de Dumënia dai Andli de juni;
• Gran Mëssa (dala 9.00) n dí dla Segra, al scumenciamënt de lugio (ulache l vën fat daldo na defileda tres l zënter de Urtijëi);
• Defileda „Gröden in Tracht”, la prima dumënia de agost a S. Cristina (2012), te Sëlva (2013) y a Urtijëi (2014) ;
• Gran Mëssa (dala 9.00) n la Gran Santa Maria ai 15 de agost;
• Pruzescion de Segra dl Rosar, la prima dumënia de utober;
• Defiledes te Gherdëina y oradeca (defileda de S. Lenert tla Val Badia, Festa da d’instà a Cianacei y n.i.).


Rengrazion l Chemun de Urtijëi, la Lia per l Turism de Urtijëi , i cumëmbri dl Fotoclub Gherdëinay dantaldut Claudio Cainelli, i cunlauradëures dl Museum de Gherdëina per la bona cunlaurazion y per si gran sustëni!
L ie na gran legrëza per nëus mantenì vives nosta tradizions liedes al guant dala gherdëina. Ulessan nvië duc i nteressei a tré sëura for plu suënz l guant dala gherdëina te ucajions de festa, per judé pea a mantenì nosc patrimone culturel.


N bel salut
La Lia Guanc dala Gherdëina Urtijëi